ប្រាក់ដុល្លារអាមេរិកបានកើនថ្លៃនៅក្នុងការជួញដូរកាលពីថ្ងៃចន្ទ ដោយសន្ទស្សន៍ប្រាក់ដុល្លារ DXY បានកើនឡើង ០,២២% ខណៈតម្រូវការរក្សាទ្រព្យសម្បត្តិដែលមានសុវត្ថិភាពបានកើនឡើង ស្របពេលសហរដ្ឋអាមេរិកបង្កើនសម្ពាធសេដ្ឋកិច្ចលើប្រទេសអ៊ីរ៉ង់។ ការកើនឡើងនេះត្រូវបានជំរុញជាចម្បងដោយការអត្ថាធិប្បាយរបស់រដ្ឋមន្ត្រីក្រសួងរតនាគារអាមេរិក លោក Scott Bessent ដែលបានបង្ហាញផែនការរបស់ទីក្រុងវ៉ាស៊ីនតោនក្នុងការកាត់ផ្តាច់អ៊ីរ៉ង់ចេញពីសេដ្ឋកិច្ចពិភពលោក។ លោកបានព្រមានថា ប្រទេសណាដែលបន្តធ្វើអាជីវកម្មជាមួយអ៊ីរ៉ង់ អាចប្រឈមនឹងទណ្ឌកម្មរបស់សហរដ្ឋអាមេរិក។

លោក Bessent បានបញ្ជាក់ថា អាមេរិកកំពុងផ្តោតលើប្រភពចំណូល និងវិស័យសំខាន់ៗរបស់អ៊ីរ៉ង់ចំនួន ៥ រួមមាន ទ្រព្យសម្បត្តិឌីជីថល បច្ចេកវិទ្យា មាស អាកាសចរណ៍ និងការដឹកជញ្ជូន។ ប្រទេសដែលពាក់ព័ន្ធនឹងសកម្មភាពសេដ្ឋកិច្ចជាមួយអ៊ីរ៉ង់ នឹងត្រូវផ្តល់ពេលវេលាដើម្បីបញ្ចប់កិច្ចសហប្រតិបត្តិការ ហើយប្រសិនបើមិនអនុវត្តតាម រតនាគារអាមេរិកនឹងចាត់វិធានការដោយខ្លួនឯង។ ការព្រមាននេះបានបង្កើនភាពមិនប្រាកដប្រជានៅក្នុងទីផ្សារហិរញ្ញវត្ថុ និងជំរុញតម្រូវការប្រាក់ដុល្លារ ដែលត្រូវបានចាត់ទុកថាជារូបិយប័ណ្ណសុវត្ថិភាពនៅពេលមានហានិភ័យភូមិសាស្ត្រនយោបាយកើនឡើង។ ទន្ទឹមនឹងនេះ ភាពទន់ខ្សោយនៃទីផ្សារភាគហ៊ុនកាលពីថ្ងៃចន្ទ ក៏បានជួយបង្កើនតម្រូវការសាច់ប្រាក់ងាយស្រួលជាប្រាក់ដុល្លារផងដែរ។

ជាការឆ្លើយតប អ៊ីរ៉ង់បានព្រមានថា ខ្លួននឹងចាត់ទុកការចូលរួម ឬការគាំទ្ររបស់ប្រទេសណាមួយចំពោះយុទ្ធនាការសេដ្ឋកិច្ចរបស់អាមេរិកប្រឆាំងនឹងអ៊ីរ៉ង់ថាជា «សកម្មភាពនៃសង្គ្រាម»។ អ៊ីរ៉ង់ក៏បានលើកឡើងពីលទ្ធភាពរារាំងការនាំចេញប្រេងតាមច្រកសមុទ្រ Hormuz និងតំបន់ឈូងសមុទ្រពែក្ស ដែលអាចបង្កើនហានិភ័យដល់ទីផ្សារថាមពលពិភពលោក។ ការកើនឡើងនៃប្រាក់ដុល្លារក៏កើតឡើងស្របពេលតម្លៃប្រេងឆៅ WTI បានធ្លាក់ចុះប្រមាណ ២% ដែលបានបន្ថយការរំពឹងទុកអំពីអតិផរណា និងបង្កើនការរំពឹងថា ធនាគារកណ្តាលអាមេរិកអាចមានភាពបត់បែនបន្ថែមលើគោលនយោបាយរូបិយវត្ថុ។ សន្ទស្សន៍សកម្មភាពជាតិរបស់ធនាគារកណ្តាលទីក្រុងឈីកាហ្គោ សម្រាប់ខែកក្កដា ក៏បានកើនពី -០,១៤ ទៅ -០,០៨ ដែលប្រសើរជាងការរំពឹងទុកបន្តិច។

នៅទីផ្សាររូបិយប័ណ្ណ អឺរ៉ូបានធ្លាក់ចុះធៀបនឹងប្រាក់ដុល្លារ ដោយ EUR/USD ថយចុះ ០,១៤%។ ការធ្លាក់ចុះនេះត្រូវបានជំរុញដោយភាពរឹងមាំរបស់ប្រាក់ដុល្លារ និងការអត្ថាធិប្បាយរបស់សមាជិកក្រុមប្រឹក្សាប្រតិបត្តិធនាគារកណ្តាលអឺរ៉ុប លោក Piero Cipollone ដែលបានព្រមានថា ការដំឡើងអត្រាការប្រាក់ដើម្បីគ្រប់គ្រងអតិផរណា អាចប៉ះពាល់ដល់កំណើនសេដ្ឋកិច្ចដែលកំពុងរងសម្ពាធរួចទៅហើយ។

ចំណែកប្រាក់យ៉េនជប៉ុនក៏បានធ្លាក់ចុះធៀបនឹងប្រាក់ដុល្លារ ដោយ USD/JPY កើនឡើង ០,១៣%។ ភាពខុសគ្នារវាងអត្រាការប្រាក់របស់ធនាគារកណ្តាលជប៉ុន និងធនាគារកណ្តាលអាមេរិកនៅតែជាកត្តាសំខាន់ដែលដាក់សម្ពាធលើប្រាក់យ៉េន។ ទោះជាយ៉ាងណា ការធ្លាក់ចុះនៃតម្លៃប្រេងបានជួយកាត់បន្ថយការខាតបង់របស់ប្រាក់យ៉េន ព្រោះជប៉ុនពឹងផ្អែកខ្លាំងលើការនាំចូលថាមពល។

ទីផ្សារក៏កំពុងបង្កើនការរំពឹងទុកថា ធនាគារកណ្តាលជប៉ុនអាចដំឡើងអត្រាការប្រាក់នៅខែកញ្ញា ឬខែតុលា ដើម្បីគាំទ្រប្រាក់យ៉េន និងទប់ស្កាត់សម្ពាធអតិផរណាដែលកើតចេញពីការធ្លាក់ថ្លៃរបស់រូបិយប័ណ្ណជប៉ុន។ ជាមួយគ្នានេះ ទីផ្សារលោហធាតុមានតម្លៃបានបង្ហាញចលនាលាយឡំគ្នា។ មាស COMEX បានកើនឡើង ០,៣៥% ដោយឈានដល់កម្រិតខ្ពស់បំផុតក្នុងរយៈពេលប្រមាណ ៣ខែកន្លះ ខណៈប្រាក់បានធ្លាក់ចុះ ១,៣៥%។ ការកើនឡើងរបស់មាសត្រូវបានគាំទ្រដោយភាពមិនប្រាកដប្រជាផ្នែកភូមិសាស្ត្រនយោបាយ ការធ្លាក់ចុះនៃការរំពឹងទុកអតិផរណា និងការរំពឹងថាធនាគារកណ្តាលអាចបន្ធូរគោលនយោបាយរូបិយវត្ថុ។ តម្រូវការមាសពីធនាគារកណ្តាលក៏នៅតែជាកត្តាគាំទ្រសំខាន់។ ទិន្នន័យកាលពីថ្ងៃទី៧ ខែសីហា បានបង្ហាញថា ទុនបម្រុងមាសរបស់ធនាគារកណ្តាលចិន PBOC បានកើនឡើង ៦៤០.០០០ អោន ក្នុងខែកក្កដា ដល់ ៧៦,០៨ លានអោនត្រយ ដែលជាការកើនឡើងជាប់គ្នារយៈពេល ២០ខែ។

សរុបមក ការកើនឡើងនៃប្រាក់ដុល្លារនៅពេលនេះកំពុងឆ្លុះបញ្ចាំងពីការកើនឡើងនៃតម្រូវការទ្រព្យសម្បត្តិសុវត្ថិភាព ខណៈភាពតានតឹងរវាងអាមេរិក និងអ៊ីរ៉ង់បន្តបង្កើនភាពមិនប្រាកដប្រជានៅក្នុងទីផ្សារហិរញ្ញវត្ថុ និងថាមពលពិភពលោក។ ទន្ទឹមនឹងនេះ ការផ្លាស់ប្តូរគោលនយោបាយរបស់ Fed, ECB និង BOJ នឹងនៅតែជាកត្តាសំខាន់សម្រាប់ទិសដៅប្រាក់ដុល្លារ អឺរ៉ូ យ៉េន និងតម្លៃមាសក្នុងរយៈពេលខាងមុខ។

ប្រែសម្រួលដោយ៖ សុធា

ប្រភព៖ Yahoo Finance