នៅក្នុងពិភពអាជីវកម្មដែលពោរពេញទៅដោយការប្រកួតប្រជែង ការធ្វើទីផ្សារមិនមែនគ្រាន់តែជាការផ្សព្វផ្សាយផលិតផល ឬសេវាកម្មឱ្យមនុស្សបានឃើញតែមួយមុខនោះទេ។ ការធ្វើទីផ្សារដែលមានប្រសិទ្ធភាព ត្រូវចាប់ផ្តើមពី ការយល់ពីមនុស្ស ពោលគឺយល់ពីតម្រូវការ បញ្ហា អារម្មណ៍ ទម្លាប់ និងអ្វីដែលជំរុញឱ្យពួកគេសម្រេចចិត្ត។ នេះជាវិធីសាស្រ្ត ទាំង៥ដែលប្រើប្រាស់ដើម្បីយល់ពីមនុស្សឲ្យកាន់តែច្បាស់៖
១. តើយើងកំពុងនិយាយជាមួយអ្នកណា?
មុនពេលបង្កើតយុទ្ធនាការទីផ្សារ អាជីវកម្មគួរតែដឹងថា អតិថិជនគោលដៅរបស់ខ្លួនជានរណា។ ពួកគេមានអាយុប៉ុន្មាន? មានមុខរបរអ្វី? រស់នៅទីណា? មានចំណាប់អារម្មណ៍អ្វី? ហើយប្រឈមនឹងបញ្ហាអ្វីខ្លះ?
ការស្គាល់អតិថិជនកាន់តែច្បាស់ នឹងជួយឱ្យអាជីវកម្មអាចបង្កើតសារទីផ្សារដែលសមស្រប និងចំទៅកាន់មនុស្សដែលខ្លួនចង់ទាក់ទាញ។
២. កុំចាប់ផ្តើមពី “យើងលក់អ្វី?” តែចាប់ផ្តើមពី “អតិថិជនត្រូវការអ្វី?”
កំហុសមួយដែលអាជីវកម្មជាច្រើនជួបប្រទះ គឺផ្តោតខ្លាំងទៅលើផលិតផលរបស់ខ្លួន ដោយនិយាយថា ផលិតផលមានលក្ខណៈពិសេសអ្វីខ្លះ ឬមានតម្លៃប៉ុន្មាន។
ប៉ុន្តែអតិថិជនភាគច្រើនចង់ដឹងថា៖ “ផលិតផលនេះអាចជួយដោះស្រាយបញ្ហារបស់ខ្ញុំបានយ៉ាងដូចម្តេច?”
ដូច្នេះ Marketing គួរតែបង្ហាញពី តម្លៃ និងដំណោះស្រាយ ដែលអតិថិជនទទួលបាន ជាជាងផ្តោតតែលើការលក់។
៣. Content ល្អ គឺ Content ដែលមនុស្សមានអារម្មណ៍ថា “និយាយពីខ្ញុំ”
Content ដែលមានប្រសិទ្ធភាព មិនចាំបាច់ត្រូវតែស្អាត ឬមានការផលិតធំដុំជានិច្ចទេ។ អ្វីដែលសំខាន់គឺ វាត្រូវឆ្លើយតបទៅនឹងអ្វីដែលមនុស្សកំពុងគិត និងត្រូវការ។
ឧទាហរណ៍ ប្រសិនបើអាជីវកម្មអចលនទ្រព្យចង់ទាក់ទាញអ្នកទិញផ្ទះ មិនគួរបង្ហាញតែរូបផ្ទះ និងតម្លៃនោះទេ។ អាចបង្កើត Content អំពី៖
- របៀបជ្រើសរើសផ្ទះសម្រាប់គ្រួសារ
- ចំណុចដែលគួរពិនិត្យមុនទិញផ្ទះ
- របៀបរៀបចំហិរញ្ញវត្ថុមុនទិញផ្ទះ
- កត្តាដែលគួរពិចារណាមុនវិនិយោគអចលនទ្រព្យ
នៅពេល Content ផ្តល់ចំណេះដឹង និងដំណោះស្រាយ វាអាចជួយបង្កើតទំនុកចិត្តជាមួយអតិថិជនបានកាន់តែប្រសើរ។
៤. ការយល់ពីមនុស្ស ជួយឱ្យការផ្សព្វផ្សាយមានប្រសិទ្ធភាពជាងមុន
នៅពេលយើងដឹងថា អតិថិជនជានរណា និងត្រូវការអ្វី យើងអាចជ្រើសរើសបានកាន់តែច្បាស់ថា តើគួរប្រើ Platform ណា? គួរបង្កើត Content ប្រភេទណា? គួរប្រើភាសាបែបណា? និងគួរផ្សព្វផ្សាយនៅពេលណា?
នេះធ្វើឱ្យការចំណាយលើ Marketing មិនមែនគ្រាន់តែ “ផ្សព្វផ្សាយឱ្យបានច្រើន” ប៉ុណ្ណោះទេ ប៉ុន្តែជាការផ្សព្វផ្សាយទៅកាន់ មនុស្សត្រឹមត្រូវ ជាមួយសារត្រឹមត្រូវ និងនៅពេលត្រឹមត្រូវ។
៥. Marketing គឺជាការកសាងទំនាក់ទំនង មិនមែនគ្រាន់តែការលក់
អតិថិជនអាចទិញផលិតផលមួយពីយើងម្តង ប៉ុន្តែប្រសិនបើយើងអាចបង្កើតទំនុកចិត្ត និងទំនាក់ទំនងល្អជាមួយពួកគេ ពួកគេអាចក្លាយជាអតិថិជនរយៈពេលវែង។
ដូច្នេះ អាជីវកម្មគួរតែស្តាប់មតិរបស់អតិថិជន ឆ្លើយតបនឹងសំណួរ សិក្សាពី Feedback និងកែលម្អផលិតផល ឬសេវាកម្មជាបន្តបន្ទាប់។
សរុបមកការធ្វើទីផ្សារដែលមានប្រសិទ្ធភាព ចាប់ផ្តើមពីការយល់ពីមនុស្ស មុននឹងគិតពីការលក់។ នៅពេលយើងយល់ពីអ្វីដែលមនុស្សត្រូវការ យើងអាចបង្កើតផលិតផលដែលមានតម្លៃ បង្កើត Content ដែលមានន័យ និងបង្កើតទំនាក់ទំនងដែលអាចនាំទៅរកទំនុកចិត្ត និងការរីកចម្រើនរបស់អាជីវកម្មក្នុងរយៈពេលវែង។
អត្ថបទដោយ៖ កណ្ណិការ
