មីកញ្ចប់ ឬមីកំប៉ុង គឺជាអាហារដែលមានប្រជាប្រិយភាពខ្លាំង ពិសេសសម្រាប់មនុស្សដែលមិនសូវមានពេលវេលាចម្អិនអាហារ ឬចូលចិត្តស្តុកអាហារងាយៗស្រួលៗទុកនៅផ្ទះ។ ជាទូទៅ មីកញ្ចប់ និងមីកំប៉ុង ត្រូវបានផលិតពីម្សៅកែច្នៃ ដែលខ្វះសារធាតុចិញ្ចឹមសំខាន់ៗ ដូចជា វីតាមីន ជាតិសរសៃ និងប្រូតេអ៊ីន បើប្រៀបធៀបទៅនឹងអាហារដូចជា បាយ ឬនំប៉័ង។ បន្ថែមពីនេះ វាមានជាតិអំបិល និងជាតិខ្លាញ់ខ្ពស់ ដែលអាចបង្កឲ្យរាងកាយទទួលរងហានិភ័យជាច្រើន។
/health(7)/5e96b983d01da_1586936160_medium.jpg)
ជាមួយគ្នានេះដែរ អ្នកជំនាញសុខភាពបានព្រមានថា ការញ៉ាំមីប្រភេទនេះជាញឹកញាប់អាចបង្កផលប៉ះពាល់ដល់សុខភាព ប្រសិនបើមិនមានការប្រុងប្រយ័ត្ន។ បើយោងតាមរយៈការចែករំលែកពីផេកហ្វេសបុកផ្លូវការរបស់ វេជ្ជបណ្ឌិតកម្ពុជាបានលើកឡើងថា៖
មីកញ្ចប់ ឬកំប៉ុងជាអាហារដែលមិនមានសារធាតុចិញ្ចឹម ដែលគួរឲ្យយើងញ៉ាំទាល់តែសោះ។ តែបើសិនជាយើងចូលចិត្តញ៉ាំមីខ្លាំង យកល្អគួរតែទាញយកប្រយោជន៍ពីវាខ្លះ កុំឲ្យប៉ះពាល់សុខភាពខ្លាំងពេក។
តើហេតុអ្វីបានជាយើងមិនគួរញ៉ាំមីច្រើនពេក?
មូលហេតុនោះគឺដោយសារតែ មីកញ្ចប់ ឬកំប៉ុងធ្វើឡើងពីម្សៅដែលមិនមានសារធាតុចិញ្ចឹមអ្វីទាល់តែសោះ ខុសពីបាយ និងនំប៉័ង។វាអាចធ្វើឲ្យយើងប្រឈមនឹងហានិភ័យជំងឺតម្រងនោម ជំងឺហើម សម្ពាធឈាមឡើងខ្ពស់ និងជំងឺសាហាវៗផ្សេងទៀត។
តើធ្វើដូចម្តេច ដើម្បីកាត់បន្ថយហានិភ័យដល់សុខភាពពេលញ៉ាំមី?
ដើម្បីចៀសវាងផលប៉ះពាល់ខ្លាំងចំពោះសុខភាព ពេលញ៉ាំមីយើងត្រូវតែអនុវត្តវិធីខាងក្រោមនេះ៖
ជំហានដំបូង គួរស្រុះមីឲ្យឆ្អិន ហើយចាក់ទឹកចោលម្តងមុននឹងដាក់ចម្អិនបន្ត។ វិធីនេះអាចជួយកាត់បន្ថយបរិមាណសូដ្យូម និងជាតិខ្លាញ់ដែលនៅសល់ក្នុងមី។ បន្ទាប់មក គួរបន្ថែមគ្រឿងផ្សំផ្សេងៗ ដូចជា បន្លែបៃតង សាច់ ឬស៊ុត ដើម្បីបន្ថែមសារធាតុចិញ្ចឹម និងធ្វើឲ្យអាហារមានតុល្យភាពល្អជាងមុន។ នៅពេលដាក់គ្រឿងរសជាតិ មិនគួរដាក់ទាំងអស់ទេ ព្រោះគ្រឿងទាំងនេះមានអំបិល និងសារធាតុកែច្នៃខ្ពស់ ដែលអាចប៉ះពាល់ដល់សុខភាព ប្រសិនបើប្រើច្រើនពេក។
ជាមួយគ្នានេះដែរ មិនគួរញ៉ាំមីលើសពី ១ កញ្ចប់ ឬ ១ កំប៉ុងក្នុងមួយថ្ងៃ ហើយគួរកាត់បន្ថយភាពញឹកញាប់ ដោយមិនឲ្យលើសពី ២ ទៅ ៣ ដងក្នុងមួយសប្តាហ៍។ពេលញ៉ាំ ក៏មិនគួរហុតទឹកមីរហូតដល់អស់ទាំងស្រុងដែរ ព្រោះទឹកមីមានជាតិអំបិល និងខ្លាញ់ខ្ពស់។
ជាចុងក្រោយ បន្ទាប់ពីញ៉ាំមីរួច គួរញ៉ាំផ្លែឈើ ដើម្បីជួយបន្ថែមវីតាមីន ជាតិសរសៃ និងជួយសម្រួលដល់ប្រព័ន្ធរំលាយអាហារ។
ការញ៉ាំមីដោយមានការយល់ដឹង និងការប្រុងប្រយ័ត្ន អាចជួយកាត់បន្ថយហានិភ័យ និងការពារសុខភាពរបស់យើងបានល្អប្រសើរជាងមុន។
អត្ថបទដោយ៖ កណ្ណិការ
