កញ្ញា សុខ ពិសី បានចាប់ផ្ដើមអាជីពជាតារាចម្រៀងនៅក្នុងពិភពសិល្បៈកម្ពុជាដោយទទួលបានការគាំទ្រយ៉ាងឆាប់រហ័សតាំងពីអំឡុងឆ្នាំ ២០០០ មក។ នាងត្រូវបានគេចាត់ទុកជា "គ្រាប់ពេជ្រ" មួយដួងនៃផលិតកម្មសាន់ដេ ដែលជាផលិតកម្មមួយធំជាងគេនៅកម្ពុជានាងបានចូលរួមជាមួយផលិតកម្មនេះអស់រយៈពេលជាច្រើនឆ្នាំនិងបានបន្សល់ទុកនូវស្នាដៃចម្រៀងល្បីៗរាប់មិនអស់។
នាងមានភាពប៉ិនប្រសប់ក្នុងការបកស្រាយបទចម្រៀងបានច្រើនប្រភេទទាំងមនោសញ្ចេតនា សប្បាយៗបែបយុវវ័យក៏ដូចជាបទឆ្លើយឆ្លងជាមួយតារាចម្រៀងប្រុសល្បីៗជាច្រើនទៀត។ នាងត្រូវបានមហាជនដាក់រហស្សនាមថាជាតារាចម្រៀងជួរមុខដែលមានប្រជាប្រិយភាពខ្លាំងក្នុងប្រទេសកម្ពុជានិងមានបទចម្រៀងជាប់ការពេញនិយមជាច្រើនឆ្នាំជាប់គ្នា។ សុខ ពិសី ត្រូវបានគេចាត់ទុកជាតារាចម្រៀងស្រីលំដាប់កំពូលមួយរូបដែលមានវត្តមាននៅលើឆាកតន្ត្រីប្រគំតន្ត្រីធំៗនិងការផ្សព្វផ្សាយពាណិជ្ជកម្មល្បីៗជាច្រើន។ ក្រៅពីសមត្ថភាពច្រៀងនាងត្រូវបានគេសរសើរពីរូបសម្រស់ស្រស់ស្អាតបែបធម្មជាតិនិងមានអត្តចរិតស្លូតបូត សុភាពរាបសា ដែលធ្វើឱ្យនាងនៅតែទទួលបានការស្រឡាញ់ពីអ្នកគាំទ្រគ្រប់ស្រទាប់វណ្ណៈ។
កញ្ញា សុខ ពិសី ក៏មិនត្រឹមតែលេចធ្លោក្នុងវិស័យសិល្បៈប៉ុណ្ណោះទេតែនាងក៏ជាតារាម្នាក់ដែលយកចិត្តទុកដាក់ចំពោះកិច្ចការសង្គមនិងមនុស្សធម៌ផងដែរ ដោយនាងតែងតែចូលរួមបរិច្ចាគថវិកានិងបន្តធ្វើសកម្មភាពមនុស្សធម៌ជាញឹកញាប់។ នាងក៏ធ្លាប់ទទួលតួនាទីជាទូតសុច្ឆន្ទៈសម្រាប់យុទ្ធនាការផ្សេងៗផងដែរ។
សុខ ពិសី មានចំណូលចិត្តចម្រៀងតាំងតែពីកុមារ ហើយដោយសារតែចង់ក្លាយជាតារាចម្រៀងនៅ វ័យ១៧ ឆ្នាំយុវតី សុខ ពិសី ក៏បានចូលខ្លួនមកហាត់ច្រៀងនៅក្នុងក្លិបសិល្បៈមួយកន្លែងក្នុងក្រុងភ្នំពេញ។ ដោយមើលឃើញថានាងមានទេពកោសល្យល្អលើវិស័យនេះ កញ្ញា ពិសី បានឈានជើងចូលផលិតកម្ម KH ដែលជាផលិតកម្មទី១របស់កញ្ញា នៅក្នុង ឆ្នាំ ២០០៥។
លុះនៅឆ្នាំ ២០០៧ តារាចម្រៀងដែលមានឈ្មោះល្បី រួចជាស្រេចនៅKH ក៏បានប្តូរទ្រនំទៅកាន់ផលិតកម្ម Nice Star ទាំងមិនទាន់បានបញ្ចប់កុងត្រាជាមួយផលិតកម្ម KH។ សុខ ពិសី បន្សល់នូវបទពិរោះៗជាច្រើនបទ ក្នុងផលិតកម្មដំបូងនេះ។ ដោយការព្យាយាមនិងខំប្រឹងប្រែងលើវិស័យមួយនេះមិនរាថយនៅឆ្នាំ២០០៨ តារាចម្រៀង សុខ ពិសី ក៏បាន ក្លាយជាតារាចម្រៀងរបស់ផលិតកម្មសាន់ដេ រហូត មកដល់សព្វថ្ងៃនេះហើយកំពុងក្រសោបបានភាពល្បីល្បាញយ៉ាងខ្លាំងផងដែរពីមួយថ្ងៃទៅមួយថ្ងៃពីមួយឆ្នាំទៅមួយឆ្នាំ សុខ ពិសី បានបង្កើនទឹកដមសម្លេង និងធ្វើឲ្យតំលៃខ្លួនក្លាយជាគ្រាប់ពេជ្ររបស់ផលិតកម្មសានដេ។
កញ្ញា សុខ ពិសី ជាតារាចម្រៀងមួយដួងដែរបានឈរជើងលើផលិតកម្មសាន់ដេ នេះមិនដែលងាករេម្ដងណាឡើយបានបន្សល់បទចម្រៀងពិរោះៗជាច្រើនបទ ដូចជា «សុខសប្បាយទេសង្សារចាស់» «លះបង់» «ស្នេហាខ្ញុំមានអ្នកទីបី» ជាពិសេស «យប់នេះខ្ញុំសេដ» «ផ្លូវកម្ម» «ខ្វេះភ្នែកអូនទៅ!» ជាដើម។ និងមានច្រៀងឆ្លើយឆ្លងជាមួយ នាយ ចើម លោក ខេមរៈ លោក ឆៃ វីរៈយុទ្ធ ជាច្រើនបទទៀត។
តាមការសង្គេត កញ្ញា សុខ ពីសី មិនមែនមានកេរ្តិ៍ឈ្មោះតែក្នុងប្រទេសប៉ុណ្ណោះទេយើងនៅចាំបានថាកាលពីថ្ងៃទី១៣ ខែមីនា ឆ្នាំ២០១៧ កន្លងទៅកញ្ញា សុខ ពិសី បានទៅកាន់ប្រទេសជប៉ុន ការទៅកាន់ប្រទេសជប៉ុនជាង១០ថ្ងៃនោះជាការចេញទៅច្រៀងជូនសមាគមមួយនៅទីនោះដើម្បីប្រមូលយកថវិកាជូនមន្ទីរពេទ្យគន្ធបុប្ជា។ នេះបញ្ជាក់ថាកញ្ញាមានការទាក់ទាញនៅក្រៅប្រទេសនិងមានការនិយមគាំទ្រលើតារាចម្រៀងរូបនេះជាខ្លាំងមិនអាចខ្វះបានដែរហើយជាទឹកចិត្តដ៏មានតំលៃមួយដែលរួមចំណែកក្នុងការលើកំពស់វិស័យមនុស្សធម៌។
ចំពោះរឿងជំនួញក្រៅពីវិស័យសិល្បៈ កញ្ញា សុខ ពិសី មានអាជីវកម្មលក់ផលិតផលតាមអនឡាញ Gimmick Collagen ដែលមានការចាប់អារម្មណ៍ខ្លាំងពី អ្នកនិយមផលិតផលនេះនិងទទួលបានការជាវយ៉ាងច្រើនពីអតិថិជន។ តាមការឲ្យដឹងវាជាផលិតផលដ៏ពេញនិយមរបស់តារានៅថៃហើយចំណែកនាងក៏ប្រើ ផលិតផលនេះដែរទើបធ្វើឲ្យរូបកញ្ញាមានរូបសម្រស់ស្អាតគួរជាទីស្រឡាញ់ពីបុរសៗ។
ដោយភាពល្បីក្នុងវិស័យសិល្បៈក៏ដូចជាសម្រស់គ្មានផ្ទឹមរបស់កញ្ញា សុខ ពិសី ធ្វើឲ្យមានការចាប់អារម្មណ៏ពីម្ចាស់ផលិតផលមួយចំនួន ។ ក្នុងនោះ កញ្ញា សុខ ពិសី ត្រូវបានក្រុមហ៊ុនទូរស័ព្ទ Vivo, Lux, Fairly lovely, Kongfulong, Zorus Cambodia, Hanna body lotion អញ្ជើញជាទូតសុច្ឆន្ទៈនៃក្រុមហ៊ុនប្រចាំប្រទេសកម្ពុជាដែលមានតំលៃរាប់ម៉ឺនដុល្លារ។ ចំពោះការចេញសម្តែងក្នុងការប្រគំតន្ត្រីម្តងៗ មានពី៥០០ដុល្លារទៅ ១០០០ដុល្លារ ចំណែកការចូលរួមច្រៀងជាកិតិ្តយសក្នុងពិធីមង្គលការមានពី៣០០ដុល្លារ ទៅ ៤០០ដុល្លារជាដើម។
សរុបសេចក្ដីមកកញ្ញា សុខ ពិសី គឺជាតារាចម្រៀងស្រីជួរមុខម្នាក់នៅកម្ពុជាដែលមានប្រវត្តិការងារសិល្បៈយូរអង្វែងរួមផ្សំដោយទេពកោសល្យសមត្ថភាពសម្រស់ និងការចូលរួមយ៉ាងសកម្មក្នុងកិច្ចការសង្គម។
អត្ថបទ៖ ជួន សុធា
