តូក្យូ ៖ ទាហានអាមេរិកដែលឈរជើងនៅកោះអូគីណាវ៉ារបស់ប្រទេសជប៉ុន ត្រូវបានដាក់ឱ្យស្ថិតក្រោមបទបញ្ជាហាមឃាត់ការចេញក្រៅនៅពេលយប់រយៈពេលមួយខែ និងហាមឃាត់មិនឱ្យពិសាគ្រឿងស្រវឹង ខណៈពេលដែលពួកគេត្រូវទទួលការបណ្តុះបណ្តាលផ្នែកវិន័យ បន្ទាប់ពីមានការចោទប្រកាន់ថា ទាហានម៉ារីនម្នាក់បានសម្លាប់និងប្លន់ស្ត្រីម្នាក់ក្នុងតំបន់។

ទាហានឈ្មោះ Devin Jacob Ballard អាយុ ២០ ឆ្នាំ ត្រូវបានសង្ស័យថាបានសម្លាប់នាង Anna Yagi អាយុ ៣៩ ឆ្នាំ នៅក្នុងសណ្ឋាគារមួយក្នុងទីក្រុង Naha ដែលជារដ្ឋធានីនៃខេត្តភាគខាងត្បូងបំផុត កាលពីថ្ងៃសៅរ៍ ហើយបានយកកាបូបលុយ និងកាបូបស្ពាយរបស់នាង។ ប៉ូលិសបានឱ្យដឹងថា Ballard បានបដិសេធការចោទប្រកាន់ទាំងនេះ។
 

ករណីនេះគឺជាហេតុការណ៍ចុងក្រោយបង្អស់នៅក្នុងឧប្បត្តិហេតុជាច្រើនដែលបានកើតឡើងអស់រយៈពេលជាច្រើនឆ្នាំកន្លងមក ដែលបានបង្កឱ្យមានការព្រួយបារម្ភអំពីវត្តមានដ៏ច្រើននៃកងទ័ពអាមេរិកនៅលើខ្សែសង្វាក់កោះក្បែរតៃវ៉ាន់ និងចិន ខណៈដែលមន្ត្រីអាមេរិកព្រមានថា វាអាចធ្វើឱ្យប៉ះពាល់ដល់ទំនាក់ទំនងដ៏សំខាន់សម្រាប់សន្តិសុខនៅអាស៊ីបូព៌ា។
លោកឧត្តមសេនីយ៍ទោ Benjamin Watson បានមានប្រសាសន៍នៅក្នុងសេចក្តីថ្លែងការណ៍មួយកាលពីថ្ងៃអង្គារ ដែលបញ្ជាឱ្យអនុវត្តវិធានការទាំងនេះថា៖ «រាល់ការប្រាស្រ័យទាក់ទងជាមួយអ្នកជិតខាងរបស់យើង គឺសុទ្ធតែអាចកសាង ឬបំផ្លាញទំនុកចិត្តដែលចាំបាច់សម្រាប់ក្រុមរបស់យើង។ នៅពេលដែលទំនុកចិត្តនោះត្រូវបានបំផ្លាញ វាប៉ះពាល់ដល់ភាពរឹងមាំនៃសម្ព័ន្ធភាពរបស់យើង និងសន្តិសុខនៃតំបន់នេះ»។ លោក Watson បានបន្ថែមថា ប្រតិបត្តិការយោធាទាំងអស់របស់សហរដ្ឋអាមេរិកនៅលើកោះ Okinawa នឹងត្រូវផ្អាករយៈពេល ៤៨ ម៉ោង ខណៈពេលដែលកងទ័ពកំពុងទទួលការបណ្តុះបណ្តាលលើស្តង់ដារ និងវិន័យ។

នាយករដ្ឋមន្ត្រី Sanae Takaichi បានហៅការសម្លាប់នៅថ្ងៃសៅរ៍ថា «ឃោរឃៅ និងសាហាវយង់ឃ្នងបំផុត»។ លោកស្រីបាននិយាយថា លោកស្រីបានតវ៉ាយ៉ាងខ្លាំងទៅកាន់សហរដ្ឋអាមេរិក និងទាមទារវិធានការដើម្បីទប់ស្កាត់ឧប្បត្តិហេតុបែបនេះនាពេលអនាគត។ ប៉ូលីសបានប្រាប់កាសែត Stars and Stripes ថា Yagi បានស្លាប់ដោយសារថប់ដង្ហើម បន្ទាប់ពី Ballard ត្រូវបានចោទប្រកាន់ថា «បានសង្កត់លើកញ្ចឹងករបស់នាង»។

បុគ្គលិកសណ្ឋាគារបានរកឃើញស្ត្រីនោះសន្លប់នៅក្នុងបន្ទប់របស់នាងនៅព្រឹកព្រលឹមថ្ងៃសៅរ៍ បន្ទាប់ពីនាងមិនបានចាកចេញ។ មន្ត្រីប្រហែល 200 នាក់បានចូលរួមក្នុងការស្វែងរកបុរសដែលត្រូវបានថតបានមុននេះនៅលើកាមេរ៉ាសុវត្ថិភាព CCTV ចូលទៅក្នុងសណ្ឋាគារជាមួយជនរងគ្រោះ នេះបើយោងតាមប្រព័ន្ធផ្សព្វផ្សាយក្នុងស្រុក។ អភិបាលខេត្តអូគីណាវ៉ា លោក Genta Koja នឹងជួបជាមួយលោក Takaichi នៅថ្ងៃពុធ ដើម្បីពិភាក្សាអំពីការឆ្លើយតបទៅនឹងឧក្រិដ្ឋកម្ម ដែលបានបង្កឱ្យមានការតវ៉ានៅទីក្រុងណាហា និងទីក្រុងតូក្យូ។

ប្រទេសជប៉ុនធ្វើជាម្ចាស់ផ្ទះនៃកងកម្លាំងអាមេរិកនៅក្រៅប្រទេសធំជាងគេបំផុតនៅទូទាំងពិភពលោក។ កងម៉ារីនភាគច្រើនដែលមានមូលដ្ឋាននៅប្រទេសជប៉ុនចំនួន 18,000 នាក់ ឈរជើងនៅអូគីណាវ៉ា ដែលសហរដ្ឋអាមេរិកបានកាន់កាប់ចាប់ពីចុងបញ្ចប់នៃសង្គ្រាមលោកលើកទី 2 រហូតដល់ឆ្នាំ 1972។ វត្តមាននោះបានបង្កឱ្យមានការមិនពេញចិត្តជាបន្តបន្ទាប់ក្នុងចំណោមប្រជាពលរដ្ឋ ពាក់ព័ន្ធនឹងបញ្ហាផ្សេងៗដូចជា សំឡេងរំខាន គ្រោះថ្នាក់ធ្លាក់យន្តហោះ និងឥរិយាបថរបស់បុគ្គលិកយោធា។ ករណីរំលោភសេពសន្ថវៈលើក្មេងស្រីជនជាតិអូគីណាវ៉ាអាយុ ១២ ឆ្នាំ ដោយទាហានអាមេរិកចំនួន ៣ នាក់ កាលពីឆ្នាំ ១៩៩៥ បានបង្កឱ្យមានការតវ៉ាទ្រង់ទ្រាយធំ។

ហេតុការណ៍សម្លាប់មនុស្សកាលពីថ្ងៃសៅរ៍អាចធ្វើឱ្យស្មុគស្មាញដល់កិច្ចខិតខំប្រឹងប្រែងរបស់លោកស្រី Takaichi ក្នុងការផ្លាស់ប្តូរទីតាំងកងម៉ារីនមួយចំនួនចេញពីមូលដ្ឋានទ័ពអាកាស Futenma ដែលមានសកម្មភាពមមាញឹក ទៅកាន់ទីតាំងដាច់ស្រយាលជាងនៅតំបន់ Henoko។ ក្រុមអ្នកប្រឆាំងចង់ឱ្យមានការផ្លាស់ប្តូរទីតាំងកងទ័ពទាំងនោះចេញពីខេត្តនេះតែម្តង។ តំបន់ Okinawa ដែលមានចម្ងាយ ១០០ គីឡូម៉ែត្រពីកោះតៃវ៉ាន់នៅចំណុចជិតបំផុតនោះត្រូវបានទីក្រុងតូក្យូ និងទីក្រុងវ៉ាស៊ីនតោនចាត់ទុកថាជាចំណុចសំខាន់ក្នុងការទប់ស្កាត់ការឈ្លានពានផ្នែកយោធាដែលអាចកើតមានពីសំណាក់ប្រទេសចិន។

បហរែសម្រួលដោយ៖ សូលីដា

ប្រភព៖ reuters