[វ៉ាស៊ីនតោន]៖ កម្មករកូរ៉េខាងត្បូងជាង ៣០០នាក់ ដែលត្រូវបានឃុំខ្លួនក្នុងប្រតិបត្តិការអនុវត្តច្បាប់អន្តោប្រវេសន៍នៅរោងចក្ររថយន្តអគ្គិសនី និងអាគុយរបស់ Hyundai-LG ក្នុងរដ្ឋ Georgia កាលពីឆ្នាំមុន កំពុងចាត់វិធានការផ្លូវច្បាប់ប្រឆាំងរដ្ឋាភិបាលសហរដ្ឋអាមេរិក។ នេះជាការប្រឈមមុខផ្លូវច្បាប់ដ៏ធំមួយពាក់ព័ន្ធនឹងប្រតិបត្តិការអន្តោប្រវេសន៍ដ៏ធំបំផុតមួយ ក្រោមរដ្ឋបាលប្រធានាធិបតី Donald Trump។ 

មេធាវីតំណាងឱ្យកម្មករបានចាប់ផ្តើមដាក់ ការទាមទារផ្នែករដ្ឋបាល ទៅកាន់ទីភ្នាក់ងារសហព័ន្ធចំនួន ៩ រួមមាន ក្រសួងសន្តិសុខមាតុភូមិ (DHS), អាជ្ញាធរអន្តោប្រវេសន៍ និងគយ (ICE), គយ និងការពារព្រំដែន (CBP), FBI ព្រមទាំងក្រសួងយុត្តិធម៌ និងក្រសួងការងារ។ ការដាក់ពាក្យបែបនេះជាជំហានមួយដែលត្រូវអនុវត្តមុនពេលអាចបន្តទៅបណ្តឹងនៅតុលាការសហព័ន្ធ។

ការវាយឆ្មក់បានធ្វើឡើងនៅថ្ងៃទី៤ ខែកញ្ញា ឆ្នាំ២០២៥ នៅទីក្រុង Ellabell រដ្ឋ Georgia ជិតទីក្រុង Savannah។ មន្ត្រីសហព័ន្ធ រដ្ឋ និងមូលដ្ឋានជិត ៥០០នាក់ បានចូលប្រតិបត្តិការនៅតំបន់រោងចក្រដ៏ធំរបស់ Hyundai ហើយបានឃុំខ្លួនមនុស្សសរុប ៤៧៥នាក់ ដែលភាគច្រើនជាជនជាតិកូរ៉េខាងត្បូង។ អាជ្ញាធរបានពិពណ៌នាប្រតិបត្តិការនេះថា ជាប្រតិបត្តិការអនុវត្តច្បាប់នៅទីតាំងតែមួយដ៏ធំបំផុតក្នុងប្រវត្តិសាស្ត្ររបស់ Homeland Security Investigations។ តាមដីកាស្វែងរកដែល CNN រាយការណ៍ ប្រតិបត្តិការនេះបានកំណត់គោលដៅលើមនុស្សចំនួន ៤នាក់ ប៉ុន្តែមិនមាននរណាម្នាក់ក្នុងចំណោមអ្នកទាំងនោះជាកម្មករកូរ៉េខាងត្បូងដែលត្រូវបានឃុំខ្លួនឡើយ។

អាជ្ញាធរអាមេរិកបានអះអាងថា ប្រតិបត្តិការនេះជាផ្នែកមួយនៃការស៊ើបអង្កេតព្រហ្មទណ្ឌពាក់ព័ន្ធនឹងការអនុវត្តច្បាប់ការងារ និងអន្តោប្រវេសន៍។ លោក Steven Schrank មន្ត្រីជាន់ខ្ពស់នៃ Homeland Security Investigations បាននិយាយថា អ្នកដែលត្រូវបានរកឃើញថាស្នាក់នៅ ឬធ្វើការដោយរំលោភលក្ខខណ្ឌអន្តោប្រវេសន៍ ត្រូវបានឃុំខ្លួន និងបញ្ជូនទៅការឃុំខ្លួនរបស់ ICE។

ផ្ទុយពីការពន្យល់របស់អាជ្ញាធរ កម្មករមួយចំនួនដែលបាននិយាយជាមួយ CNN បានអះអាងថា ពួកគេត្រូវបានឃុំខ្លួនដោយគ្មានការពន្យល់ច្បាស់លាស់ ហើយមួយចំនួននិយាយថា ពួកគេមិនមានអ្នកបកប្រែភាសាកូរ៉េនៅពេលត្រូវបានសាកសួរ ឬចុះហត្ថលេខាលើឯកសារ។ កម្មករមួយចំនួនបានអះអាងថា ពួកគេមិនយល់ច្បាស់ពីឯកសារដែលត្រូវចុះហត្ថលេខា ហើយក្រោយមកទើបដឹងថាវាពាក់ព័ន្ធនឹងការយល់ព្រមចាកចេញពីសហរដ្ឋអាមេរិក។

មេធាវីដែលតំណាងឱ្យកម្មករបាននិយាយថា កម្មករជាង ៣០០នាក់មានការទាមទារស្រដៀងគ្នា ដោយស្នើសុំសំណងពាក់ព័ន្ធនឹងការឃុំខ្លួន ការបាត់បង់ការងារ ការរឹបអូសទ្រព្យសម្បត្តិ និងផលប៉ះពាល់ផ្លូវចិត្ត។ មេធាវីក៏បានអះអាងថា គោលបំណងមួយរបស់ការដាក់ពាក្យគឺចង់ឱ្យរដ្ឋាភិបាលអាមេរិកទទួលស្គាល់ និងសុំទោសចំពោះអ្វីដែលពួកគេចាត់ទុកថាជាការប្រព្រឹត្តមិនត្រឹមត្រូវ។ ទោះជាយ៉ាងណា DHS បានបញ្ជាក់ថា ICE បានអនុវត្តដីកាស្វែងរកដែលចេញដោយតុលាការ ហើយប្រតិបត្តិការនេះជាផ្នែកមួយនៃការស៊ើបអង្កេតព្រហ្មទណ្ឌដែលកំពុងបន្ត។ CBP ក៏បានអះអាងថា អ្នកដែលត្រូវបានឃុំខ្លួនមួយចំនួនត្រូវបានរកឃើញថាធ្វើការដោយរំលោភលក្ខខណ្ឌទិដ្ឋាការ ឬស្ថានភាពអន្តោប្រវេសន៍របស់ពួកគេ។

ករណីនេះបានបង្កើតសំណួរមួយទៀតជុំវិញការប្រើប្រាស់ទិដ្ឋាការរបស់អ្នកជំនាញបរទេស ដើម្បីចូលរួមក្នុងការសាងសង់ និងដំណើរការរោងចក្របច្ចេកវិទ្យាខ្ពស់នៅសហរដ្ឋអាមេរិក។ កម្មករមួយចំនួនបានអះអាងថា ពួកគេចូលមកសហរដ្ឋអាមេរិកដោយមានទិដ្ឋាការ ឬការអនុញ្ញាតស្របច្បាប់ ហើយធ្វើការងារបណ្តុះបណ្តាល ដំឡើង និងរៀបចំឧបករណ៍ ដែលពួកគេយល់ថាស្ថិតក្នុងវិសាលភាពការងារដែលអនុញ្ញាត។ ប៉ុន្តែអាជ្ញាធរអាមេរិកបានបញ្ជាក់ថា ការកាន់ទិដ្ឋាការ ឬ ESTA មិនមានន័យថាបុគ្គលនោះត្រូវបានអនុញ្ញាតឱ្យចូល ឬធ្វើការគ្រប់ប្រភេទនៅសហរដ្ឋអាមេរិកដោយស្វ័យប្រវត្តិនោះទេ ហើយការសម្រេចចិត្តចូលប្រទេសត្រូវបានធ្វើឡើងតាមករណីនីមួយៗ។

បញ្ហានេះកាន់តែស្មុគស្មាញ ដោយសារក្រុមហ៊ុនអាមេរិកតែងតែពឹងផ្អែកលើអ្នកជំនាញបរទេសក្នុងការសាងសង់ និងចាប់ផ្តើមរោងចក្របច្ចេកវិទ្យាខ្ពស់ ខណៈច្បាប់ទិដ្ឋាការរបស់អាមេរិកមានកម្រិតច្បាស់លាស់ចំពោះប្រភេទការងារដែលជនបរទេសអាចធ្វើបាន។

ការទាមទាររបស់កម្មករត្រូវបានដាក់ក្រោមច្បាប់ Federal Tort Claims Act (FTCA) ដែលអាចបើកផ្លូវឱ្យមានបណ្តឹងនៅតុលាការសហព័ន្ធ ប្រសិនបើរដ្ឋាភិបាលមិនដោះស្រាយការទាមទារក្នុងរយៈពេលដែលច្បាប់កំណត់។ អ្នកជំនាញច្បាប់បានពន្យល់ថា កម្មករត្រូវបង្ហាញថាការឃុំខ្លួន ឬសកម្មភាពរបស់មន្ត្រីបានរំលោភច្បាប់ដែលអាចអនុវត្តបាន។ ក្នុងករណីនេះ ការអះអាងមួយចំនួនអាចត្រូវពិនិត្យក្រោមច្បាប់រដ្ឋ Georgia។ ប៉ុន្តែរដ្ឋាភិបាលអាមេរិកអាចលើកឡើងពីការការពារផ្លូវច្បាប់មួយចំនួនសម្រាប់សកម្មភាពរបស់មន្ត្រីសហព័ន្ធដែលធ្វើឡើងក្នុងការអនុវត្តភារកិច្ចរបស់ពួកគេ។ ដូច្នេះ លទ្ធផលនៃការទាមទារនេះនៅមិនទាន់ច្បាស់លាស់នៅឡើយ។

ករណីនេះក៏កើតឡើងនៅពេលដែលសហរដ្ឋអាមេរិកកំពុងព្យាយាមទាក់ទាញការវិនិយោគពីក្រុមហ៊ុនកូរ៉េខាងត្បូង ដើម្បីពង្រឹងការផលិតក្នុងស្រុក។ រោងចក្រ Hyundai-LG នៅ Georgia គឺជាផ្នែកមួយនៃការវិនិយោគដ៏ធំរបស់កូរ៉េខាងត្បូងក្នុងវិស័យរថយន្តអគ្គិសនី និងអាគុយនៅអាមេរិក។ ការវាយឆ្មក់បានធ្វើឱ្យការសាងសង់រោងចក្ររងការរំខាន ប៉ុន្តែការងារបានបន្តឡើងវិញនៅពេលក្រោយ ហើយរោងចក្របានចាប់ផ្តើមផលិតកម្មពាណិជ្ជកម្ម។

ក្រុមហ៊ុនពាក់ព័ន្ធបានបញ្ជាក់ថា ខ្លួនផ្តល់អាទិភាពដល់ការអនុលោមតាមច្បាប់ និងប្រើប្រាស់អ្នកជំនាញបរទេសជាបណ្តោះអាសន្ន ដើម្បីផ្ទេរជំនាញរហូតដល់រោងចក្រអាចដំណើរការដោយខ្លួនឯង។ ទោះជាយ៉ាងណា កម្មករមួយចំនួនបាននិយាយថា ពួកគេនៅតែមានការព្រួយបារម្ភពីការវាយឆ្មក់អន្តោប្រវេសន៍ឡើងវិញ ទោះបីពួកគេត្រូវបានហៅឱ្យត្រឡប់មកធ្វើការនៅសហរដ្ឋអាមេរិកក៏ដោយ។ ហេតុការណ៍នេះបានបង្ហាញពីភាពតានតឹងរវាងគោលដៅពីររបស់រដ្ឋបាល Trump គឺការទាក់ទាញការវិនិយោគ និងពង្រឹងការផលិតនៅសហរដ្ឋអាមេរិក ខណៈពេលជាមួយគ្នាបង្កើនការអនុវត្តច្បាប់អន្តោប្រវេសន៍នៅកន្លែងធ្វើការ។

សម្រាប់កម្មករកូរ៉េខាងត្បូងដែលកំពុងប្រឈមនឹងដំណើរការផ្លូវច្បាប់នេះ សំណួរសំខាន់បន្តទៅមុខ គឺថាតើរដ្ឋាភិបាលអាមេរិកនឹងឆ្លើយតបយ៉ាងដូចម្តេចចំពោះការទាមទាររបស់ពួកគេ និងថាតើករណីនេះអាចក្លាយជាបទពិសោធន៍សំខាន់សម្រាប់ការអនុវត្តច្បាប់អន្តោប្រវេសន៍នៅកន្លែងធ្វើការនាពេលអនាគតឬយ៉ាងណា។

ប្រែសម្រួលដោយ៖ សុធា

ប្រភព៖ CNN