[វ៉ាស៊ីនតោន]៖ ភ្លើងឆេះព្រៃដ៏សន្ធោសន្ធៅដែលកំពុងវាយប្រហារភាគខាងលិចសហរដ្ឋអាមេរិក មិនត្រឹមតែបង្កការខូចខាតដល់លំនៅឋាន និងហេដ្ឋារចនាសម្ព័ន្ធប៉ុណ្ណោះទេ ប៉ុន្តែថែមទាំងអាចក្លាយជាគ្រោះមហន្តរាយអាកាសធាតុចុងក្រោយ ដែលធ្វើឱ្យទីផ្សារធានារ៉ាប់រងអចលនទ្រព្យប្រឈមនឹងសម្ពាធថ្មី បន្ទាប់ពីទើបតែចាប់ផ្តើមមានស្ថិរភាពឡើងវិញ។ អ្នកជំនាញបានលើកឡើងថា ភ្លើងឆេះព្រៃដែលបានឆាបឆេះទីក្រុង Spokane ក្នុងរដ្ឋវ៉ាស៊ីនតោន កាលពីចុងសប្តាហ៍ និងបំផ្លាញផ្ទះរាប់រយខ្នង បានបង្កឱ្យមានការព្រួយបារម្ភថា ក្រុមហ៊ុនធានារ៉ាប់រងអាចនឹងដំឡើងថ្លៃបុព្វលាភ ឬកាត់បន្ថយការផ្តល់សេវាគ្របដណ្តប់នៅតំបន់ដែលមានហានិភ័យខ្ពស់ ដូចដែលបានកើតឡើងរួចមកហើយនៅរដ្ឋកាលីហ្វ័រញ៉ា។

ក្នុងរយៈពេលប៉ុន្មានឆ្នាំចុងក្រោយនេះ ក្រុមហ៊ុនធានារ៉ាប់រងជាច្រើននៅទូទាំងសហរដ្ឋអាមេរិក បានដកខ្លួនចេញពីតំបន់ដែលប្រឈមនឹងគ្រោះមហន្តរាយបង្កឡើងដោយការប្រែប្រួលអាកាសធាតុ ឬបានបង្កើនអត្រាបុព្វលាភយ៉ាងខ្លាំង។ នៅរដ្ឋកាលីហ្វ័រញ៉ា ស្ថានភាពនេះបានវិវត្តទៅជាវិបត្តិ ដោយម្ចាស់ផ្ទះជាច្រើនត្រូវពឹងផ្អែកលើ FAIR Plan ដែលជាគម្រោងធានារ៉ាប់រងគាំទ្រដោយរដ្ឋ សម្រាប់អ្នកដែលមិនអាចទទួលបានការធានាពីទីផ្សារឯកជន។

រហូតមកដល់ពេលនេះ រដ្ឋវ៉ាស៊ីនតោននៅតែអាចរក្សាស្ថិរភាពបានល្អជាងរដ្ឋជិតខាង។ ទោះបីម្ចាស់ផ្ទះមួយចំនួនបានជួបការលុបចោលគោលនយោបាយ ឬការកើនឡើងនៃបុព្វលាភក៏ដោយ ប៉ុន្តែប្រជាពលរដ្ឋភាគច្រើននៅតែអាចទិញធានារ៉ាប់រងពីក្រុមហ៊ុនឯកជនបាន។ ក្នុងប៉ុន្មានខែថ្មីៗនេះ ចំនួនគោលនយោបាយដែលត្រូវបានលុបចោលបានថយចុះ ហើយអត្រាបុព្វលាភក៏មានស្ថិរភាពផងដែរ។

លោក David Forte ទីប្រឹក្សាជាន់ខ្ពស់ផ្នែកគោលនយោបាយអចលនទ្រព្យ និងគ្រោះថ្នាក់នៃការិយាល័យស្នងការធានារ៉ាប់រងរដ្ឋវ៉ាស៊ីនតោន បានឱ្យដឹងថា រដ្ឋកំពុងឆ្ពោះទៅរកទីផ្សារធានារ៉ាប់រងដែលមានការប្រកួតប្រជែង និងមានស្ថិរភាពជាងមុន ប៉ុន្តែភ្លើងឆេះព្រៃលើកនេះបានធ្វើឱ្យស្ថានភាពនោះស្ថិតក្រោមភាពមិនច្បាស់លាស់ជាថ្មី។ ភ្លើងបានឆ្លងកាត់ទន្លេ Spokane កាលពីថ្ងៃសៅរ៍ ក្រោមឥទ្ធិពលខ្យល់បក់ខ្លាំង និងបានរាលដាលយ៉ាងឆាប់រហ័សទៅកាន់ភាគពាយ័ព្យនៃទីក្រុង។ ផ្ទះប្រមាណ ៧០០ខ្នង ត្រូវបានបំផ្លាញ ខណៈប្រជាពលរដ្ឋប្រមាណ ៦០,០០០នាក់ ត្រូវជម្លៀសចេញពីលំនៅឋាន។ មន្ត្រីរដ្ឋបានចាត់ទុកវាជាអគ្គិភ័យដ៏បំផ្លិចបំផ្លាញបំផុតមួយក្នុងប្រវត្តិសាស្ត្ររដ្ឋវ៉ាស៊ីនតោន។

លោក Forte បានបញ្ជាក់ថា និយតករធានារ៉ាប់រងបានស្នើឱ្យក្រុមហ៊ុនធានារ៉ាប់រងផ្តល់ទិន្នន័យ ដើម្បីវាយតម្លៃទំហំនៃការខូចខាត និងចំនួនសំណងដែលនឹងត្រូវទូទាត់។ លោកបានរំលឹកថា ក្នុងរដូវភ្លើងឆេះព្រៃឆ្នាំ២០២៣ ក្រុមហ៊ុនធានារ៉ាប់រងបានចំណាយប្រមាណ ២៤០លានដុល្លារ សម្រាប់សំណងទាក់ទងនឹងភ្លើងឆេះព្រៃ។ លោកបានបន្ថែមថា ប្រសិនបើរដូវភ្លើងឆេះព្រៃឆ្នាំ២០២៦ មានទំហំប្រហាក់ប្រហែលឆ្នាំ២០២៣ ទីផ្សារអាចនៅតែទ្រាំទ្របាន។ ប៉ុន្តែបើការខូចខាតកើនឡើងជាច្រើនដង វាអាចបង្កផលប៉ះពាល់យ៉ាងធ្ងន់ធ្ងរដល់វិស័យធានារ៉ាប់រង។

ក្រៅពីទំហំការខូចខាតជាក់ស្តែង អ្នកជំនាញបានលើកឡើងថា អ្វីដែលគួរឱ្យបារម្ភជាងគេគឺ «ការយល់ឃើញអំពីហានិភ័យ» របស់ក្រុមហ៊ុនធានារ៉ាប់រង។ ឆ្នាំនេះ ផ្ទៃដីជាង ២លានហិកតា ត្រូវបានភ្លើងឆេះនៅរដ្ឋ Oregon និង Washington ដែលជាកម្រិតខ្ពស់បំផុតក្នុងប្រទេស។ ស្ថានភាពនេះអាចជំរុញឱ្យក្រុមហ៊ុនធានារ៉ាប់រងពិចារណាដំឡើងថ្លៃ ឬកាត់បន្ថយការគ្របដណ្តប់ក្នុងតំបន់ដែលមានហានិភ័យ។

នៅរដ្ឋ Oregon ដែលរងផលប៉ះពាល់ពីភ្លើងឆេះព្រៃជាបន្តបន្ទាប់ ប្រជាពលរដ្ឋជាច្រើនបានជួបការកើនឡើងនៃបុព្វលាភ និងការលុបចោលគោលនយោបាយ ហើយអ្នករស់នៅកាន់តែច្រើនបានងាកទៅប្រើ FAIR Plan របស់រដ្ឋ។ ទោះជាយ៉ាងណា ស្ថានភាពនៅទីនោះនៅមិនទាន់ធ្ងន់ធ្ងរដូចនៅរដ្ឋកាលីហ្វ័រញ៉ានៅឡើយទេ។

តំណាងឧស្សាហកម្មធានារ៉ាប់រងបានអះអាងថា វានៅតែលឿនពេកក្នុងការសន្និដ្ឋានថា ភ្លើងឆេះព្រៃនៅ Spokane នឹងផ្លាស់ប្តូរទីផ្សារធានារ៉ាប់រងយ៉ាងដូចម្តេច។ ប៉ុន្តែពួកគេបានសង្កត់ធ្ងន់ថា ប្រព័ន្ធបទប្បញ្ញត្តិគួរតែមានភាពបត់បែន និងអនុញ្ញាតឱ្យក្រុមហ៊ុនកំណត់តម្លៃធានារ៉ាប់រងឆ្លុះបញ្ចាំងតាមកម្រិតហានិភ័យពិតប្រាកដ។ ផ្ទុយទៅវិញ ក្រុមអ្នកតស៊ូមតិការពារសិទ្ធិអ្នកប្រើប្រាស់បានព្រមានថា ក្រុមហ៊ុនធានារ៉ាប់រងអាចយកគ្រោះមហន្តរាយនេះធ្វើជាហេតុផលដើម្បីស្នើសុំដំឡើងបុព្វលាភ ឬដាក់កម្រិតថ្មីលើការគ្របដណ្តប់។ លោក Doug Heller នៃ Consumer Federation of America បាននិយាយថា ក្រុមហ៊ុនធានារ៉ាប់រងជាញឹកញាប់ឆ្លៀតយកឱកាសបន្ទាប់ពីគ្រោះមហន្តរាយ ដើម្បីជំរុញការកែប្រែដែលផ្តល់អត្ថប្រយោជន៍ដល់ខ្លួន។

ចំណែកលោកស្រី Carmen Balber នៃអង្គការ Consumer Watchdog បានលើកឡើងថា នៅរដ្ឋកាលីហ្វ័រញ៉ា ក្រុមហ៊ុនធានារ៉ាប់រងធ្លាប់ប្រើវិបត្តិភ្លើងឆេះព្រៃ ដើម្បីជំរុញឱ្យមានបទប្បញ្ញត្តិដែលអំណោយផលសម្រាប់ឧស្សាហកម្ម ហើយមានហានិភ័យថា ស្ថានភាពស្រដៀងគ្នានេះអាចកើតឡើងនៅរដ្ឋវ៉ាស៊ីនតោនផងដែរ។ ទោះជាយ៉ាងណា តំណាងវិទ្យាស្ថានព័ត៌មានធានារ៉ាប់រង (Insurance Information Institute) បានអះអាងថា ព្រឹត្តិការណ៍មួយតែមួយមិនទំនងជាអាចផ្លាស់ប្តូរទីផ្សារទាំងមូលបានទេ ព្រោះក្រុមហ៊ុនធានារ៉ាប់រងបានត្រៀមខ្លួនរួចជាស្រេចសម្រាប់គ្រោះមហន្តរាយប្រភេទនេះ។

មន្ត្រីរដ្ឋ អ្នកជំនាញ និងតំណាងឧស្សាហកម្មបានអំពាវនាវឱ្យម្ចាស់ផ្ទះ និងសហគមន៍បង្កើនការវិនិយោគក្នុងវិធានការបង្ការភ្លើងឆេះព្រៃ ដូចជាការសម្អាតរុក្ខជាតិជុំវិញលំនៅឋាន និងការប្រើប្រាស់សម្ភារសំណង់ដែលធន់នឹងភ្លើង។ កាលពីថ្ងៃចន្ទ ស្នងការធានារ៉ាប់រងរដ្ឋវ៉ាស៊ីនតោន លោកស្រី Patty Kuderer បានចេញបទបញ្ជាបន្ទាន់មួយ ដោយផ្តល់រយៈពេលអនុគ្រោះដល់ម្ចាស់គោលនយោបាយក្នុងការបង់បុព្វលាភ ហាមឃាត់ការលុបចោលគោលនយោបាយដោយសារការយឺតយ៉ាវក្នុងការទូទាត់ និងពន្យារពេលជូនដំណឹងសម្រាប់គោលនយោបាយដែលផុតកំណត់។ វិធានការនេះអនុវត្តចំពោះតំបន់ទាំងអស់ដែលរងការបំផ្លាញដោយភ្លើងឆេះព្រៃ។

លោក David Forte បានសន្និដ្ឋានថា វានៅតែលឿនពេកក្នុងការវាយតម្លៃថា ភ្លើងឆេះព្រៃនៅ Spokane នឹងប៉ះពាល់ដល់ទីផ្សារធានារ៉ាប់រងរដ្ឋវ៉ាស៊ីនតោនកម្រិតណា។ អាទិភាពបច្ចុប្បន្ន គឺការជួយជនរងគ្រោះឱ្យទទួលបានសំណងធានារ៉ាប់រង និងវាយតម្លៃទំហំពិតប្រាកដនៃការខូចខាត មុននឹងអាចកំណត់ផលប៉ះពាល់រយៈពេលវែងលើទីផ្សារបាន។

ប្រែសម្រួលដោយ៖ សុធា

ប្រភព៖ Eurasia Review